അവിവേകികൾ...

ഒരിക്കൽ ഞാൻ ചോദിച്ചു..

ജീവിതം അതെന്താണ്..

അന്നെന്റെ മനസിന്

പക്വതയും പാകതയുമില്ലെന്ന്

നിങ്ങളെന്നെ വിമർശിച്ചു..

പിന്നെ ഞാൻ ചോദിച്ചു.

പക്വത, അതെന്തെന്ന്..

നിങ്ങളുടെ ചിരിയിൽ

എന്റെ അറിവില്ലായ്മയോടുള്ള

പരിഹാസമായിരുന്നു.

ഇന്ന് ഞാൻ എന്റെയീ

പക്വമല്ലാത്ത മനസുകൊണ്ട്

പാകതയില്ലാത്ത ഹൃദയം കൊണ്ട്

ജ്ഞാനമില്ലാത്ത തലച്ചോറുകൊണ്ട്

പെരും നുണകളുടെ കെട്ടഴിക്കുന്നു..

പക്വതയെക്കുറിച്ച് അറിവിനെക്കുറിച്ച്

ജീവിതത്തെക്കുറിച്ച് മരണത്തെക്കുറിച്ച്

പാതയോരപന്തലുകളിൽ ഘോരഘോരം

അസംബന്ധങ്ങൾ വിളിച്ചു കൂവുമ്പോൾ

കേട്ടിരിന്നു കയ്യടിക്കുന്നതും നിങ്ങൾ തന്നെ

ഇപ്പോൾ

എന്റെ സംശയം മറ്റൊന്നാണ്

സത്യത്തിൽ നമ്മളിൽ ആരാണ്

യഥാർഥ അവിവേകികൾ….